Halkan Ka Daawo Wararkii Ugu Danbeeyay Dagaalada Tan Iyo Saaka Ka Socday Magaalada Kismaayo Ee Gobolka Jubadda Hoose Iyo Xarakada Al-Shabaab Oo Ay Ku Adagtahay Meel Ay Magaalada Uga Baxaan+Sawiro

Kismaayo-(JBBCNEWS) Ciidamada huwanta ayaa caawa ku gabal dhacsaday labo jiho oo ku beegan magaalada Kismaayo, iyadoo xiisad dagaal magaalada laga dareemayo iyo rasaas goos goos mararka qaar la maqlayo.

Guuxa diyaarado dul heehaabaya ayaa magaalada laga maqlayaa, waxaana mararka qaar cirka ka ifiyay dhimbil rasaas qoriga lidka diyaaradaha laga ridayay oo lagaga gaashaamanayay diyaaradaha mararka qaar duqeynayay.

Ciidamada huwanta ee maanta dhanka Badda ka yimid ayaa waxna xaalkooda iska bedelin, iyagoo difaacyo ka sameystay goobihii saaka soo galeen oo ku dhow dhow dhinaca xeebta, iyagoo magaalada u jira ilaa 6-KM.

Sidoo kale Ciidamada dhulka joogay ee aagga Janaay Cabdalla ayaa soo gaaray halka lagu magacaabo Xaar Xaar oo galbeedka magaalada ku yaal, kaasoo qiyaastii 20-KM u jira Kismaayo.

Labada dhinac ayaa isku horfadhiya dhinaca waqooyi ee magaalada meel ilaa 6-KM u jirta, halkaasoo caawa laga dareemayay xiisado dagaal.

Inkastoo Afhayeen u hadlay Kenya uu sheegtay inay heystaan qeybo ka mid ah magaalada, hadana waxaa magaalada si buuxda u maamulaya dagaalyahanada Shabaab oo ku sugan xarumahoodii, iyadoo ay shaqeyneyso Idaacada Andulus oo wararka dagaalada tabineysa.

Kenyanka ayaa isticmaalaya baro-bagaan dhinaca dagaalka, iyadoo gelinkii dambe maanta lagu daadiyay waraaqo ay labada dhinac kaga qornaayeen dad beeraha tacbanaya oo barwaaqo iyo dhinac dad hubeysan oo lagala jeeday Shabaab iyo dad macluulsan.

Sawiro la qaaday bishii Febraayo ee sanadkan iyo bishii December ee sanadkii hore ayaa muujinayay horu dhaca duulaanka Kenya, iyadoo Askari ka tirsan Ciidamada Kenya uu koofidiisa ku qortay in Kismaayo uu shaah ku cabi doono.

Laakiin mudadaas iyo wixii u dhaxeeyay ayaan magaalada si sahal lagu imaan ama lagu soo gaarin, waxaase lama filaan ay noqotay markii Ciidamada huwanta ee Kenya iyo Soomaalida ay ku dhiiradeen inay badda ka soo galaan magaalada, iyagoo ilaa afar markab ka soo degay.

Wasaarada Gaashaandhiga Kenya ayaa soo bandhigay sawiro iyo muuqaalo la xiriiray inta diyaarinta howl galada ku wajahnaa Kismaayo socdeen, sida xeebaha looga daabulayay Ciidamada huwanta.

Xaalada magaalada oo maanta oo dhan aheyd mid jahwareer ka taagnaa, ayaa hadana mar kasta ay suura gal tahay inay wax iska bedelaan, maadaama dagaalka haatan ku sii socda, warbaahinta iyo aduunkana ay isha ku hayaan hadba xaaladaha ku soo kordha xeyndaabka dagaalka ay gashay magaalada.

NB: Sawiradan waa kuwo hore oo ka muuqda howl galadii Ciidamada Kenya soo wadeen, min Bur-Gabo ilaa deegaanka Taabto iyo deegaanada kale.

undefined undefined

undefined

 

 

Categories: HOME

Post navigation

Comments are closed.

Blog at WordPress.com.

%d bloggers like this: