Madaxwayne Siilaanyo Oo Xalay Kulan La Yeeshay Safiirka Cusub Ee Midowga Yurub U Soo Magacaabay Wadanka Soomaaliya Md.Michele Cervone D’urso+Vidoe

Hargeysa-(GRN) Caasimada Somaliland ee Hargeysa ayaa waxa maanta booqasho ku yimid ergayga cusub ee Midowga Yurub u soo magacaabay arimaha Somaliya Michele Cervone D’Urso, kaasi oo maanta galinkii hore Muqdisho kula soo kulmay Madaxwaynaha Somaliya Xasan Sheekh Maxamuud.

Ergayga midowga Yurub u qaabilsan Somaliya Michele Cervone D’Urso oo caawa ku sugan Hargeysa ayaa kulan la yeeshay Madaxwaynaha Somaliland Md Axmed Maxamed Maxamuud (Siilaanyo), oo ku sii dhaweeyay qasriga Madaxtooyadda.

Ergayga oo ay Somaliland ku soo dhaweeyeen Wasiirro ka tirsan xukuumadda Somaliland, ayaa kulanka ay yeesheen Madaxwaynaha Somaliland, aan la ogeyn waxay kaga wada hadleen, balse waxa la filayaa inay soo wada qaadeen dawlada cusub ee Somaliya ka dhalatay iyo sidii ay Somaliland wada hadaladii ay la bilowday Sheekh Shariif la sii ambo-qaado xukuumadda Madaxwayne Xasan Sheekh Maxamuud.

Kulankan dhex Maray Madaxwaynaha Somaliland iyo ergayga gaarka ah ee Midowga Yurub u qaabilsan Somaliya oo ahaa mid albaabadu xidhnaayeen, balse warbaahinta loo ogolaaday oo kaliya inay sawiro ka qaataan, ayaa la sheegay in waxyaabaha kale ee ay kaga wada hadleen ay ka mid ahaayeen sidii midowga Yurub u kordhin lahaa deeqaha bani-aadaminimo ee uu Somaliland ku taageero.

Markii kulankaasi dhamaaday ka dib, ayaa Wasiirka Wasaarada arimaha dibada Somaliland Dr Maxamed Cabdilaahi Cumar warbaahinta uga waramay nuxurka waxyaabihii ay ka wada hadleen, waxaanu sheegay inay Madaxwaynaha iyo ergaygu ka wada hadleen xidhiidhka Somaliland iyo Midowga Yurub iyo waliba mashaariicda Midowga Yurub ka caawiyo Somaliland.

 

Garbodadarnews/Hargeysa/Somaliland

Categories: HOME

Post navigation

Comments are closed.

Blog at WordPress.com.

%d bloggers like this: